Уапсена американска тинејџерка – покренала празен воз, па направила судир

Американската полиција уапси тинејџерка за која се тврди дека покренала празен воз во метрото на Њујорк, па откако по кусо возење, направила судир со друг паркиран воз – побегнала. Се трага и по нејзин машки придружник, за кого се верува дека, исто така, бил во возот.

Фотографиите од надзорните камери, објавени од Њујоршкиот полициски оддел прикажуваат едно лице облечено целосно во розово, вклучително и розова капа за туширање, и друго – во сина тренерка.

Парот се качил на празен воз паркиран на метро станицата „Брајарвуд“ во њујоршката општина Квинс, кратко по полноќ на 12 септември и некако го покренале. По судирот, двајцата побегнале. Полицијата вчера околу пладне ја уапсила 17-годишната девојка. Таа е обвинета за престап и несовесно загрозување во сообраќајот, се вели во полицискиот извештај.

Не е јасно колкава материјална штета е предизвикана. Нема информации за повредени.