Меџити: Законот за бранители е заглавен и очекуваме дека таму и ќе остане

„Законот за бранители е заглавен во комисија која се води од Илире Даути и очекуваме дека таму и ќе остане“.

Ова во интервју за Радио Слободна Европа го изјави првиот вицепремиер Изет Меџити како одговор на прашањето дали од коалицијата ВРЕДИ разговарале по ова прашање со премиерот Христијан Мицкоски.

– Дилемата и прашањето е зошто СДСМ кој до вчера се бореше со граѓански концепт, кој направи резултат и со албански гласови, има видни членови Албанци и во нивните структури, зошто не направи ништо за ова додека беше на власт последните осум години? И зошто баш сега имаат предлог за бранителите? Ова мислам дека е дневна политика и оди во функција на дестабилизација на процесите и на државата. Значи, синхронизирани се со ДУИ, само за да не одговараат – тврди Меџити.

Тој во интервјуто напомена и дека „во вторник ќе се укинат дел од онлајн казината“.

– На наредната седница се очекува да се укинат онлајн казината, дадени на незаконски начин со што ќе ги повлечеме казината од нашите деца од нашите домови – вели Меџити за РСЕ.