СДСМ бара оставка од Тошковски

Портпаролката на СДСМ, Богданка Кузеска денеска порача дека вчерашниот инцидент во кој беше нападната градоначалничката на Скопје го потврди она што како партија го говореле со месеци. Според неа, со доаѓањето на, како што вели, ВМРО-МВРО на власт, во Македонија преку ноќ се појавија организирани криминални групи кои се чувствуваат недопирливи, затоа што се заштитени од власта.

„Инцидентот вчера и срамното непостапување на МВР и Тошковски, беше порака до секој што ќе се осмели да зборува за криминал, да покаже злоупотреби, да посочи корупција. Порака дека ќе биде нападнат, натепан и замолчен.

Криминалците се длабоко инфилтрирани во институциите, тие го водат системот. Тоа го гледаме од првиот ден. Обезбедувачите на премиерот се главни тепачи, попречуваат акции за дрога, издаваат државни тајни на нарко кланови. Се случија преку 25 обиди за убиства и убиства за една година, се пука на секој чекор а Тошковски во интервјуа безочно лаже дека се намалил криминалот.

Вчера загина лице во Батинци во престрелка како на Див Запад. Како Тошковски може да тврди дека безбедноста е подобрена, кога имаме убиство на армиски службеник од лице со потерница? Како се случува лице со активна потерница да се движи слободно и извршува убиство? Но овој последен настан, кога веќе директно криминалците напаѓаат а полицијата немо гледа и ги штити, е веќе доказ дека државата е управувана од овие луѓе“, истакна Кузеска.

Портпаролката на СДСМ наведува дека градоначалничката на Скопје со месеци открива криминал и тоа ја поткопува удобноста на мрежите што власта ги одржува во Чаир и во цело Скопје.

„Вчерашниот настан е порака до секој судија, секој обвинител, секој државен службеник или граѓанин да не се осмели да го чепне криминалот на власта. Ова е порака дека секој кој ќе им ги орткрие кримииналите може да биде следниот. Ова е систем на страв и закани кој доаѓа директно од власта.

За една година под ВМРО-ДПМНЕ секој граѓанин се чувствува помалку сигурен во сопствената дражава, во сопствениот дом и маало. Крајно време е Панче Тошковски да си поднесе неотповиклива оставка. Насилството и криминалот царуваат, а тој немо стои и ги брани партиските бизнис интереси. Од надежен министер за една години стана извршител на мафијата и заштитник на криминалот. Мора да си оди веднаш“, рекоа меѓу другото од „Бихаќка“.