Туристите можеби ќе треба да платат такса од 250 долари кога ги посетуваат САД

Туристите, меѓународните студенти и бизнисмените можеби ќе треба да платат такса од 250 долари кога ги посетуваат САД со привремена виза, објавија американските медиуми.

Според адвокатската фирма „Енвоу Глобал“, новата одредба ќе се применува само за посетители од земји на кои им е потребна привремена виза за влез во САД во согласност со законот за трошење потпишан од американскиот претседател Трамп.

Се’ уште нема официјален датум кога ќе почнат да се собираат таксите, пишува Хил. Почнувајќи од 2026 година, таксата од 250 долари би можела да се зголеми за да се прилагоди на инфлацијата, соопшти адвокатската фирма.

Министерката за внатрешна безбедност Кристи Ноем ќе биде одговорна за утврдување на конечниот износ потребен за влез во земјата. Посетителите можат да добијат поврат на средствата ако ги почитуваат условите на нивната виза, а на оние на кои им е одбиен влез нема да им се наплати такса. Сепак, таксата е задолжителна и не може да се откаже, и мора да се плати покрај таксата поврзана со регистрацијата за пристигнување/заминување на странци, позната како „такса за образецот I-94“. Законот, исто така, ја зголеми цената на образецот од 6 на 24 долари.

Постојат загрижености дека новата мерка ќе предизвика проблеми со оглед на очекуваното присуство на големи настани во САД, вклучувајќи ги и Летните олимписки игри во 2028 година. Новата одлука доаѓа во време кога администрацијата на Трамп се обидува да се справи со нелегалната имиграција и да ги засили напорите за депортација, според Хил.

Златко Шумковски