Мафијашките пресметки го примораа претседателот на Црна Гора, да свика итна седница на Советот за национална безбедност

По серијата убиства и пукотници во кои беа вклучени членови на мафијашки кланови што се случија во Црна Гора во претходните неколку дена, се огласи претседателот на оваа земја, Јаков Милатовиќ.

Меѓу другото, Милатовиќ изјави дека донел одлука за свикување итна седница на Советот за одбрана и безбедност на Црна Гора.

„Седницата ќе се одржи во најкраток рок предвиден со закон. Покрај членовите на Советот – претседателот на Собранието и премиерот, на седницата ќе бидат поканети и претставници на Владата чија надлежност се безбедносните служби, како и раководителите на клучните безбедносни институции – Управата на полицијата и Агенцијата за национална безбедност“, рече тој.

Тој објасни и што ќе побара од институциите.

„Детален увид во моменталната состојба, јасни, решителни и веднаш применливи мерки за зачувување и заштита на јавната безбедност“, објасни тој.

Конечно, рече дека сите мора да ја разберат сериозноста на ситуацијата.

„Граѓаните мора да имаат чувство дека државата стои зад нив – силно, организирано и без двоумење. Поради сериозноста на ситуацијата, очекувам присуство на сите поканети членови и учесници на седницата“, заклучи тој.

Патем, Милатовиќ се огласи откако вчера во Подгорица беше убиен Иван Милачиќ, член на кланот Шкаљар. Малку порано беше убиен Игор Недовиќ, кој е исто така член на мафијашки кланови, а минатата недела во Барселона беше убиен Филип Кнежевиќ, кој е исто така поврзан со членови на кланот Кавак.