Тошковски ќе го награди полицискиот службеник кој спречи девојка да скокне и да си го одземе животот

Министерот за внатрешни работи Панче Тошковски по вчерашниот настан во Тетово, каде полициски службеници спречија трагедија и спасија млад живот, денеска го прими и разговараше со Беким Исмани, кој спречи девојка да скокне и да си го одземе животот, а притоа беше повреден од ножот кој таа го држела во раката, информирата од МВР.

Станува збор за млада девојка, жртва на тешка животна ситуација и психолошка криза.

-Благодарение на навремената и решителна интервенција на нашите полициски службеници од СВР Тетово, таа денеска е жива и надвор од опасност.

Ова не е само службено постапување, ова е чин на пожртвуваност, хуманост и длабока посветеност на мисијата да се заштити секој човечки живот. Во рамки на законските можности, ќе го наградам колегата Беким Исмани како признание за неговата храброст, професионализам и несебично постапување, потенцирал министерот Тошковски.

Тошковски уште еднаш го нагласил фактот дека вистинската сила на полициската професија се гледа во најтешките моменти.