„Вашингтон пост“ го објави планот на Трамп за ривиера во Газа

Целото население на Газа ќе биде преместено, а САД ќе ја преземат контролата врз палестинската територија според план што го разгледува администрацијата на претседателот Доналд Трамп, објави „Вашингтон пост“.

Енклавата, која Израел целосно ја уништи во војната со Хамас, ќе биде претворена во протекторат управуван од САД најмалку 10 години, објави весникот.

Една од целите на планот, моделиран според претходно зацртаната визија на Трамп, е да ја претвори Газа во „Блискоисточна ривиера“, туристичко одморалиште и технолошки центар, според „Вашингтон пост“, кој виде документ од 38 страници во кој се опишува иницијативата.

Во него се бара барем привремено преместување на сите два милиони жители на Газа или „доброволно заминување“ во друга земја или во ограничени безбедносни зони во рамките на енклавата за време на реконструкцијата, се вели во весникот.

На жителите на Газа кои поседуваат земјиште ќе им биде даден „дигитален токен“ во замена за правото да го развиваат своето земјиште. Примателите би можеле да го користат „токенот“ за да започнат живот на друго место или потенцијално да го заменат за стан во еден од шест до осум нови „паметни градови напојувани од вештачка интелигенција“ што се планира да се изградат во Газа.„Вашингтон пост“ цитираше луѓе запознаени со плановите и размислувањата на администрацијата за судбината на повоената Газа

Трамп претходно го шокираше светот кога предложи САД да ја преземат контролата врз Појасот Газа, да ги иселат сите луѓе и да изградат недвижнини на брегот таму. Израелскиот премиер Бенјамин Нетанјаху го пофали предлогот, кој беше остро критикуван од многу европски и арапски земји.

Трамп претседаваше со состанок минатата недела за повоените планови за Газа, но Белата куќа не издаде никакво официјално соопштение ниту објави некакви одлуки. Телото што ќе управува со Газа според планот што сега се разгледува ќе се вика GREAT Trust.

„Вашингтон пост“ објави дека предлогот го развиваат некои од Израелците кои го основаа американско-израелскиот хуманитарен фонд за Газа (GHF), кој дистрибуира храна во енклавата и е критикуван од многу групи за човекови права, како и од Обединетите нации.

На 22 јули, Канцеларијата за човекови права на ОН соопшти дека израелските сили убиле повеќе од 1.000 Палестинци кои се обидувале да добијат помош за храна во Газа откако започнале операциите на GHF, при што речиси три четвртини од нив се убиени во близина на местата за дистрибуција на GHF.

Зетот на Трамп, Џаред Кушнер, го објави планот и во интервју со што потврди дека ваквата операција е долго планирана.

Повоениот план на администрацијата на Трамп за Газа вклучува, покрај децениското старателство на САД за Појасот Газа и преселувањето на 2,3 милиони Палестинци, и инвестиции во обнова, индустрија, туризам и домување, според извештај на „Вашингтон пост“.

Според извештајот, секој Палестинец кој ќе одлучи да замине ќе добие 5.000 долари во готово и средства за субвенционирање на кирија за четири години и храна за една година. Секое заминување би ѝ заштедило на фондацијата 23.000 долари во споредба со трошоците за обезбедување привремено домување и хуманитарни услуги во безбедни зони за оние кои ќе останат.

„Вашингтон пост“ исто така објави дека на палестинските сопственици на земјиште ќе им бидат дадени дигитални токени за права на користење на нивниот имот, кои би можеле да се користат за да се обезбеди „нов живот на друго место“ или да се искористат за станови што ќе се градат во „паметни“ градови. Проектите би вклучувале и автопатска и трамвајска рута околу Газа; железница, цевководи и инсталации со оптички влакна за поврзување на Газа со Египет, Израел и Јордан; мало пристаниште и аеродром; соларни постројки и постројки за десалинизација; индустриски зони; и луксузни одморалишта на брегот.

Проектот би бил финансиран од инвестиции во проекти од приватниот и јавниот сектор, а не од средства од владата на САД. Според извештаите, се пресметува дека инвестиција од 100 милијарди долари (85 милијарди евра) би можела да се зголеми четирикратно во текот на една деценија.

Според „Вашингтон пост“, Фонфот за Газа „бил развиен од некои од истите Израелци кои го создадоа и го поставија во движење“ GHF. Според проспектот на Големиот фонд, израелската армија би имала „одговорност за целокупната безбедност“, додека GHF би користела приватни изведувачи за дистрибуција на помош, воведување јавен ред и изградба и управување со привремени станови. GHF би обучувал локални полициски сили, додека Фондот постепено би ја префрлил власта на „независна палестинска држава“ составена од проверени Палестинци. Израел и Палестинците би се согласиле на долгорочни безбедносни аранжмани за Газа.

Египет, Обединетите Арапски Емирати и Палестинската самоуправа изнесоа повеќе планови за повоената Газа, кои предложија да го преземат управувањето со Газа додека продолжува реконструкцијата финансирана од надворешни извори. Арапските лидери кои се состанаа на ниво на самит во март го поддржаа египетскиот предлог за создавање влада на палестински технократи и меѓународен и инвестициски фонд од 53 милијарди долари за расчистување на урнатините на Газа и обнова, додека Палестинците би се засолниле во привремени сместувачки капацитети во Газа.

Иако понудија обука на палестинските безбедносни сили, Каиро и Аман го повикаа Советот за безбедност на Обединетите нации да воспостави мировна мисија за следење на управувањето и реконструкцијата. Хамас се согласи да се предаде на технократска влада и го поздрави планот на Египет, но вели дека нема да се разоружа ниту да го врати управувањето со Газа на Палестинската самоуправа. Израел инсистираше на разоружување на Хамас.(nezavisen.mk)