Србија ќе го урива Генераштабот оштетен во НАТО бомбардирањето за да гради зетот на Трамп
Српскиот парламент вчера донесе нов закон со кој се дозволува уривање на зградата на Генералштабот, архитектонски симбол на Белград оштетен во бомбардирањето на НАТО во 1999 година. Одлуката го отстранува нејзиниот статус на културно наследство, отворајќи го патот за изградба на луксузен хотелски комплекс поврзан со семејството на Доналд Трамп, објавува „Њујорк тајмс“.
Проектот е вреден половина милијарда долари и вклучува изградба на хотел и апартмани со брендот Трамп на местото на поранешен воен комплекс. Плановите претходно беа запрени поради обвиненија за измама против владини претставници кои го поддржуваа.
Сепак, пратениците од владејачката партија на претседателот Александар Вучиќ минатиот викенд објавија дека ќе користат посебна уставна одредба за да го протуркаат законот и да го оживеат проектот. Овој потег предизвика остри осуди од студенти, заштитници на природата, обвинители и опозициски политичари.
Дополнителна загриженост изрази и Европската комисија, предупредувајќи за кршење на владеењето на правото во Србија, земја која е кандидат за членство во ЕУ со години.
И покрај критиките, усвојувањето на законот беше очекувано со оглед на тоа што Српската напредна партија на претседателот Вучиќ и нејзините сојузници имаат мнозинство во парламентот. Официјалните лица потврдија дека законот ќе стапи на сила утре.
Пратеникот Миленко Јованов, кој го презентираше законот, во вторник во парламентот изјави дека тој ќе ги ревитализира бомбардираните згради кои со години стојат празни „без план што да се прави со нив“.
Јованов, исто така, истакна дека проектот би можел да ја обезбеди наклонетоста на администрацијата на Трамп во време кога Србија балансира меѓу односите со Москва и Западот, особено во светлината на американските царини за српскиот увоз и санкциите што ги засегаат партнерите на владата на Вучиќ.
„Отвораме простор и создаваме можности земјата да продолжи напред“, рече Јованов. „Тоа е нашата главна цел и нашата главна задача. Дали тоа ќе доведе до подобрување на односите со администрацијата на Трамп, со Соединетите Американски Држави – искрено, би сакал“, додаде тој.
Од друга страна, критичарите тврдат дека овој закон уништува зграда што пратеничката на опозицијата Мариника Тепиќ ја нарече „симбол на отпор и доказ дека еден народ што е скршен и една држава што е пропадната може повторно да се подигне“.
„Денес, сакате да го претворите тој симбол во луксузен комплекс, само за да му угодите на Доналд Трамп. На самото место каде што некогаш паѓаа бомби, сега планирате да сипете шампањ“, рече Тепиќ за време на дискусијата.
Зградата на Генералштабот, завршена во 1960-тите, се смета за ремек-дело на повоената модернистичка архитектура. Таа беше тешко оштетена во воздушните напади на НАТО во 1999 година, кои беа одговор на српската агресија во Косово.
Идејата за изградба на хотел на таа локација првпат ја изнесе Доналд Трамп во 2013 година. Во мај 2024 година, Србија ги одобри плановите за проектот, кој вклучува хотел со 175 соби, малопродажен простор и повеќе од 1.500 станови. Проектот ќе се реализира преку 99-годишен закуп со компанија поврзана со Џаред Кушнер, зетот на Трамп, а планирана е и изградба на споменик на жртвите од бомбардирањето на НАТО.
