Сплитскиот суд евакуиран поради закана со бомба

Утрово во Сплитскиот окружен суд беше примена дојава за поставена експлозивна направа, поради што зградата беше евакуирана, а рочиштата одложени.

Дојавата беше примена непосредно пред 9 часот наутро, неколку минути пред почетокот на рочиштето на кое требаше да се донесе одлуката за потврдување на обвинението против Ненад Петрак и неговите соработници, пишува „Слободна“.

Службениците на судската полиција ги известија адвокатите и сите присутни веднаш да ги напуштат просториите, а зградата беше евакуирана за кратко време. Полицијата спроведува антиексплозивен увид.

Се очекува официјална потврда за резултатите од истрагата на лице место и информации за тоа кога судот ќе продолжи со редовна работа.

Уапсен нарко-бос во Турција

За потсетување, Петрак беше уапсен во ноември 2023 година во населбата Ускудар во Истанбул. Турскиот министер за внатрешни работи Али Јерликаја по повод ова изјави дека Петрак бил водач на нарко-картел кој превезувал дрога од Јужна Америка во Европа и ја дистрибуирал низ цела Европа.

Петрак потоа беше депортиран во Хрватска, каде што беше задржан во притвор под сомнение за учество во обидот за атентат врз сплитскиот криминалец Јосип Чубелиќ. Чубелиќ беше застрелан и ранет во Скалице, Сплит, во април 2023 година.