МИСТЕРИОЗНАТА БЕЛА ПЕНА ОД ВАРДАР СЕ ПОЈАВИ И ВО ЗЕЛЕНИКОВО
Утрово жителите на селото Таор во општина Зелениково беа сведоци на загрижувачка глетка – одводниот канал што се влива во реката Вардар осамна покриен со густа, необична пена во обем значително поголем од вообичаеното.
Инцидентот се случил веднаш по активирањето на пумпите за препумпување на отпадните води од системот на Скопско Поле, што веднаш го вклучи алармот кај локалните власти за можно сериозно хемиско загадување на најголемата македонска река.
Градоначалникот на Зелениково, Коста Маневски, итно излезе на терен заедно со екипите на АД „Водостопанство“ за да извршат увид. Ситуацијата е потенцијално сериозна бидејќи овој систем ги собира отпадните води од широк појас кој ги опфаќа општините Гази Баба, Арачиново, Илинден и Петровец – регион каде што има и индустриски капацитети и земјоделски површини, што го прави пронаоѓањето на изворот на загадувањето приоритет.
За да се утврди што точно тече во Вардар, на барање на општината, екипи од Институтот за јавно здравје веднаш земаа примероци од водата и од сомнителната пена за хемиска анализа. Резултатите треба да покажат дали станува збор за детергенти, индустриски хемикалии или друг вид на опасен отпад.
Случајот е пријавен и до Државниот инспекторат за животна средина, од каде се очекува да преземат итни мерки за лоцирање и санкционирање на сторителот доколку се утврди човечки фактор. Општина Зелениково најави целосна транспарентност и вети дека веднаш штом стигнат резултатите, јавноста ќе биде известена за составот на пената и за опасноста што таа ја претставува за екосистемот на Вардар.
