Белгискиот министер за буџет Ван Петегем кандидат за претседател на Еврогрупата

Вицепремиерот и министер за буџет и административно поедноставување на Белгија, Винсент Ван Петегем синоќа во гостување на белгиската државна телевизија ВРТ соопшти дека поднел кандидатура за нов претседател на Еврогрупата.

Инаку, покрај Ван Петегем до крајниот рок, вчера во 17 часот, кандидатура за претседател на Еврогрупата поднел и грчкиот министер за финансии Киријакос Пиеракакис.

Еврогрупата е консултативно тело на министри за финансии од земјите од Еврозоната во чија надлежност се прашања поврзани со европската финансиска и монетарна политика, а нејзиниот претседател се смета за еден од повлијателните функционери во Европа. Претседателот на Еврогрупата се избира од редовите на министрите кои се нејзини членови и тој по изборот ја задржува и министерската функција.

Местото прв човек на Еврогрупата остана испразнето откако досегашниот претседател Паскал Донахју на 18 ноември поднесе оставка на оваа и на функцијата ирски министер за финансии, со цел да ја преземе должноста управен директор во Светската банка.

Во својата кандидатура, Ван Петегем нагласува дека претходно како министер за финансии од 2020 година и сега како министер за буџет од февруари годинава, има искуство во усогласување на различни позиции и постигнување избалансирани и остварливи договори.

– Сакам да ја пренесам истата посветеност на инклузивност и транспарентност и во Еврогрупата, пишува Ван Петегем во својата кандидатура.

Во гостувањето на ВРТ, Ван Петегем истакна дека Еврогрупата и Европа имаат потреба од стабилност и континуитет.

– Долго време разговараме за создавање Унија на пазарите на капитал и за Банкарска унија. Јас сакам да го остварам тоа, рече белгискиот министер.

Ван Петегем има најдолг стаж во Еврогрупата меѓу нејзините актуелни членови и доаѓа од редовите на партијата Христијански демократи и Фламанци (ЦДВ), која е дел од најголемата партиска групација во ЕУ, Европската народна партија (ЕПП).

Ваквата биографија, би го истакнала Ван Петегем како фаворит за функцијата, но тешката буџетска ситуација во Белгија и нејзиното противење на планот за користење на замрзнатите руски средства за заем за финансиска поддршка на Украина, сепак, би можеле да му донесат негативни поени и да му дадат предност на Пиеракакис, кој исто така е од редовите на ЕПП. Сепак, „негативна препорака“ за Пиеракакис може да биде историјата на финансиска нестабилност на Грција во претходниот период, иако земјата сега има релативно избалансиран буџет.

Идниот претседател на Еврогрупата треба да биде избран на нејзиниот состанок на 11 декември. За да биде избран, кандидатот за претседател на Еврогрупата треба да добие поддршка на најмалку 11 од вкупно 20-те нејзини членови. Претседателот се бира за мандат од две и пол години со право на реизбори.