По ракетните напади, Амбасадата со препораки за Македонците во Саудиска Арабија

Амбасадата на Македонија во Абу Даби упати итно предупредување до македонските државјани кои престојуваат во Саудиска Арабија, особено во Ријад, поради влошената безбедносна состојба и серијата ракетни напади и напади со беспилотни летала.

Во објавата, Амбасадата ги повика граѓаните да бидат крајно внимателни и доследно да ги почитуваат официјалните упатства на саудиската Дирекција за цивилна заштита и Министерството за внатрешни работи.

При активирање на безбедносна тревога или сирена, граѓаните треба веднаш да влезат во затворен простор и да се оддалечат од прозорците и стаклените површини. Се препорачува да избегнуваат јавни собири, воени објекти и пограничниот појас со Јемен.

Амбасадата предупреди и дека фотографирањето, снимањето и споделувањето видеа од нападите е строго забрането според законите во Саудиска Арабија, а за ваквите објави на социјалните мрежи се предвидени казни. Граѓаните се повикуваат да ги одржуваат телефоните наполнети и да пријавуваат сомнителни предмети или паднати остатоци преку саудиската апликација Tawakkalna.

Во однос на авиосообраќајот, иако летовите повторно се воспоставуваат, можни се вонредни одложувања и откажувања. Затоа, надлежните препорачуваат патниците задолжително да ја контактираат својата авиокомпанија и да го проверат статусот на летот пред да тргнат кон меѓународниот аеродром „Крал Калид“ во Ријад.

За итна помош и асистенција, македонските државјани можат да се јават на дежурниот телефон на Амбасадата во Абу Даби: +971 56 441 7532.

Од Амбасадата апелираат информацијата да се сподели со останатите македонски државјани кои се наоѓаат во Саудиска Арабија.