Сириски браќа обвинети за убиство на својата сестра во Холандија

Според обвинителството, станува збор за „убиство поради чест“, бидејќи семејството сметало дека девојката донела „срам“ со своето „западњачко однесување“ и тоа што имала момче.

Холандските власти се сомневаат дека таткото на семејството, Калед Ал Наџар – кој е во бегство – го издал налогот за ликвидацијата, објави Telegraph.

Телото најдено во мочуриште

Рајан беше исчезната шест дена кога случаен минувач го пронашол нејзиното тело на 28 мај во мочуриште кај Лејлистад, околу 40 километри од Амстердам.

Според обвинението, браќата ѝ ги заврзале устата и рацете, ја оптовариле со тегови и ја фрлиле во вода. На нејзините нокти е пронајден ДНК материјал од таткото, што укажува дека девојката очајно се борела пред смртта. Процесот против Калед се води во отсуство.

Браќата ја префрлаат вината, обвинителството не им верува

Иако и двајцата се изјасниле за невини, тврдејќи дека само го слушале таткото, обвинителството не ја прифаќа нивната верзија.

Таткото испратил две електронски писма до холандски медиуми во кои презел „целосна одговорност“ и тврдел дека синовите се невини, но обвинителите ги отфрлаат овие тврдења како обид да ги заштити.

Дополнително, се открива дека Рајан до неодамна била под полициска заштита поради семејните закани – мерка која била укината непосредно пред убиството.

Таткото избегал во Сирија

Според истражувањето на холандскиот Nieuwsuur, Калед Ал Наџар моментално се наоѓа во северна Сирија, каде повторно се оженил. Холандското министерство за правда наведува дека нема начин да се бара негово екстрадирање, бидејќи правосудната соработка со Сирија е невозможна.

Но сириското Министерство за правда тврди спротивно – дека нивниот правосуден систем е целосно функционален и дека не примиле „никаков официјален барање“ од Холандија за овој случај.

Растечки проблем во Европа

Случајот повторно го отвора прашањето за „убиства од чест“ во Европа. Холандската полиција секоја година обезбедува засилена заштита за најмалку пет жени за кои се проценува дека се изложени на ваков ризик.

Извештаи од повеќе земји укажуваат дека бројот на убиства поради чест и поврзани форми на насилство е во пораст во последните две до три децении.

Извор: trn.mk