Ловокрадците ги уништија африкански шумски слонови

Проценетиот број на шумски слонови во Африка, кои се многу загрозени од ловокрадство, е ревидиран нагоре благодарение на подоброто евидентирање, соопшти Меѓународната унија за заштита на природата (IUCN).

Унијата го проценува нивниот број на 135.960, што е за 16 отсто повеќе од последните податоци од 2016 година.

„Ажурираниот број за африканските шумски слонови не треба да се толкува како пораст на популацијата, туку како резултат на подобра покриеност со пописот, овозможена со методи засновани на ДНК“, рече Роб Слотов од IUCN, зоолог специјализиран за овој животински вид.

Најголемиот дел од оваа ревизија доаѓа од една земја, Габон, каде што се наоѓаат две третини од светскиот број на видот на тие слонови (Loxodonta cyclotis), кои IUCN ги смета за критично загрозени.

Саванскиот слон (Loxodonta africana) е посебен вид, пораспространет низ Африка, со околу 350.000 единки. И тој е загрозен вид.

Популацијата на шумски слонови нагло опаднала „за повеќе од 86 отсто во последните 30-тина години до 2015 година, првенствено поради ловокрадството и губењето на живеалиштето“, наведе IUCN.

Се чини дека овие животни денес се нешто подобро заштитени бидејќи ловокрадството поради слоновата коска, особено по 2018-2019 година, изгледа е намалено, вели меѓународната организација.

Се наведува дека шумските слонови забрзано остануваат без живеалиште бидејќи шумите се сечат и се претвораат во земјоделско земјиште.

„Тоа, последователно, може да доведе до напади на слоновите врз посевите … Тие напади ја намалуваат толеранцијата на луѓето кон слоновите и, за жал, може да доведат до заемни убиства“, наведува IUCN.

Закрепнувањето на популациите на слонови е комплицирано поради малата стапка на репродукција на тој вид.

Извештајот е објавен по повод конференцијата на Конвенцијата за меѓународна трговија со загрозени видови дива фауна и флора, која се одржува во Узбекистан.

Намибија бара да се одобри продажба на 46,3 тони заби од слонови кои угинале природно, а парите од тоа да се користат исклучиво за заштита на слоновите.

Извор: trn.mk