Црвена полумесечина: Десет лица повредени во напад на израелски доселеници на Западниот Брег

Палестинската Црвена полумесечина соопшти дека десет лица се повредени денеска во судири со израелските доселеници во близина на Витлеем на окупираниот Западен Брег.

„Десет лица се повредени во напади на доселеници во областа Халаил ал-Луз, јужно од Витлеем, во кои имаше еден повреден во напад со оружје и девет повредени поради тепање“, се наведува во соопштението.

Израелската армија и полиција соопштија дека армијата е „испратена во периферијата на Витлеем по извештаите за насилни судири меѓу израелски цивили и Палестинци“.

Во соопштението се наведува дека Палестинците и Израелците „фрлале камења едни кон други“ и дека имало пукање.

Израелските сили, се додава во соопштението на армијата, прогласија „затворена воена зона“ во областа каде што се случил нападот.

Судирите на окупираниот Западен Брег продолжуваат и покрај прекинот на огнот во Појасот Газа, кој стапи на сила на 10 октомври.

Од почетокот на војната во Газа во октомври 2023 година, израелската армија и доселениците убиле повеќе од илјада Палестинци, според тамошните власти.

Според израелските власти, најмалку 44 Израелци биле убиени во истата област.