Европарламентарци се во посета на Белград – Вучиќ и Брнабиќ ги обвинуваа дека не се најавиле
Делегацијата на Комитетот за надворешни работи на Европскиот парламент (АФЕТ ЕП) денеска во Парламентот на Србија ќе се сретне со потпретседателката на Парламентот Елвира Ковач, а потоа одделно со членовите на опозицијата и парламентарното мнозинство.
Во рамките на посетата на Белград се планирани средби и со претставници на Владата на Србија, невладиниот сектор, медиумите и академската заедница.
Европските парламентарци прво ќе се сретнат со потпретседателката на парламентот и претседателката на Комитетот за европски интеграции, Елвира Ковач, а потоа со претставниците на опозициските парламентарни групи, како и со претставниците на парламентарните групи на партиите од владејачката коалиција.
Најавено е дека пратениците од опозициските партии – Партија за слобода и правда, Народно движење на Србија, Ново лице на Србија, Зелено-левичарски фронт, Српски центар и Движење на слободни граѓани ќе се обратат на медиумите по средбата со делегацијата на АФЕТ ЕП.
Делегацијата од девет члена на Европскиот парламент, предводена од португалската европратеничка Марта Темидо, нема да биде примена од српскиот претседател Александар Вучиќ и претседателката на парламентот Ана Брнабиќ, кои се надвор од земјата.
Претходно, Брнабиќ тврдеше дека европратениците не ја информирале навреме за посетата и дека немало консултации во врска со датумот, што Европскиот парламент го негираше.
Европратениците престојуваат во Белград од 22 до 24 јануари, а на крајот од посетата ќе одржат прес-конференција. Се очекува да дадат извештај по посетата.
