Германија нуди награда од еден милион евра за апсење на одговорните за саботажа на берлинската електрична мрежа

Германските власти понудија награда од еден милион евра за информации што ќе доведат до апсење на одговорните за саботажа на берлинската електрична мрежа, која остави десетици илјади луѓе без струја со денови, објави ДПА.

Министерката за внатрешни работи на покраината Берлин, Ирис Шпрангер, изјави дека сумата ја понудила „федералната влада“, опишувајќи ја сумата како „уникатна“.

„Тука зборуваме за тероризам“, изјави Шпрангер пред комисијата за внатрешни работи на берлинскиот покраински парламент.

Околу 45.000 домаќинства во југозападен Берлин останаа без електрична енергија и греење на температури под нулата откако високонапонските кабли беа запалени претходно оваа година – најдолгото затемнување на градот од Втората светска војна.

Потребни беа повеќе од четири дена за да се врати електричната енергија.

Нападот врз електричната мрежа, исто така, повторно ја разгоре дебатата за подобра заштита на клучната инфраструктура, како и за одговорот на градските власти на кризи.

Властите веруваат дека група левичарски активисти стои зад нападот, но досега не се уапсени осомничени.