Поради рускиот напад над 1.100 станбени згради во Киев се без греење

Повеќе од 1.100 станбени згради во Киев и околината се без греење поради рускиот напад врз инфраструктурата во главниот град на Украина, објави градоначалникот Виталиј Кличко на платформата Телеграм.

Температурата на воздухот денеска попладне изнесуваше минус девет степени, а се очекува во текот на ноќта да се спушти до минус 17 Целзиусови степени.

Кличко посочи дека во синоќешните руски напади оштетен е градскиот систем за греење.

Претседателот на Украина, Володимир Зеленски, на денешната средба со генералниот секретар Марк Руте во Киев, наведе дека Русија го прекршила енергетско примирје и презела масовен напад.

Русите уште еднаш ги игнорираа напорите на американската страна. Како што знаете, имаше барање од претседателот на САД да се воздржат од напади врз енергетскиот сектор и клучната инфраструктура за време на состанокот на нашите преговарачки тимови. Американскиот претседател кажа да се избегнуваат нападите една недела. Тоа беше многу важна одлука. Тоа енергетско примирје почна во петокот, а синоќа, како што видовме, Русите го прекршија ветувањето, посочи Зеленски.

Додека украинскиот министер за енергетика Денис Шмихал наведе дека синоќешните руски напади биле насочени исклучиво кон цивилни објекти и ги оцени како „обид за зимски геноцид“.

Русија синоќа изврши комбиниран напад користејќи различни видови ракети лансирани од воздух и од земја, како и дронови за напад. Украинската воздушна одбрана собори 450 од 521 лансирани проектили.

Утре и в четврток во главниот град на Обединети Арапски Емирати, Абу Даби продолжуваат преговорите помеѓу Украина и Русија, со посредство на САД, за изнаоѓање на мировно решение. На разговорите помеѓу руската и украинската делегација во Абу Даби ќе присуствува и американскиот специјален претставник Стив Виткоф.