Трамп се закани дека ќе го блокира новиот мост меѓу САД и Канада поради трговски спорови

Американскиот претседател Доналд Трамп се закани дека ќе го блокира отворањето на новиот мост што ги поврзува САД и Канада, наведувајќи го како причина недостигот на „праведност и почит“ од страна на канадската влада во услови на тековните трговски тензии.

– Нема да дозволам овој мост да се отвори додека САД не бидат целосно обесштетени за сè што им дадовме, и што е уште поважно, додека Канада не се однесува кон Соединетите Држави со праведност и почит што ги заслужуваме, напиша Трамп на својата социјална мрежа Truth Social.

Тој исто така побара меѓународниот мост „Горди Хау“ преку реката Детроит, да биде барем 50 проценти во сопственост на САД, додавајќи дека преговорите ќе почнат веднаш, пренесе ДПА.

Мостот ги поврзува градот Виндзор во канадската провинција Онтарио со Детроит во американската сојузна држава Мичиген и е дизајниран за сообраќај со шест ленти, како и за пешаци и велосипедисти.

Канада ја финансира изградбата, која треба да се надомести преку патарини, а мостот е планиран да биде отворен подоцна оваа година. Официјални лица претходно изјавија дека тој ќе ја поттикне трговијата меѓи соседните земји.

Трамп ја критикуваше Канада дека не користи американски производи како челик во изградбата и поради нејзиниот неодамна најавен ограничен ангажман со Кина во трговијата – потег што веќе го поттикна да се закани со царини од 100 отсто за канадскиот увоз и за канадските авиони.

Трамп често ги користи заканите со царини за да ги наметне своите политики, понекогаш без на крајот да ги реализира. Неговите забелешки доаѓаат откако канадскиот премиер Марк Карни привлече внимание на Светскиот економски форум во Давос со говор кој беше нашироко протолкуван како критика на пристапот на Трамп „Америка на прво место“.

Американскиот претседател во повеќе наврати ја изрази својата желба да ја направи Канада 51-ва американска држава.