ВМРО-ДПМНЕ бара Обвинителството да отвори истрага по допрен глас за користење службено возило за приватни цели од страна на претседателот на ССМ, Трендафилов
Пратеничката група на ВМРО-ДПМНЕ денеска повторно ѝ даде поддршка и ги осуди нападите врз својата колешка и заменик-координаторка Дафина Стојаноска од страна на претседателот на ССМ, Слободан Трендафилов, по објавените фотографии, на кои се гледа дека тој за приватни цели го користи службеното возило. Го повикаа Јавното обвинителство веднаш да отвори истрага по допрен глас, а Трендафилов да одговори колку пати го злоупотребил службеното возило за приватни цели и прошетки, колку литри гориво се потрошени од членарините, „и за што сè друго ја има злоупотребено својата положба додека глуми скромност и голем заштитник на социјалната правда во Македонија“.
– Она што го видовме од страна на Слободан Трендафилов не е ништо друго помалку од директен атак, обид за замолчување и брутален притисок врз жената во политиката. Трендафилов избра на кукавички начин да ја нападне жената што имаше храброст јавно да го изнесе неговото расипништво. Ова е класичен пример на мизогинија, каде што маж на функција се обидува да дискредитира и деградира жена, само затоа што ја обелоденила вистината – рече на прес-конференција пратеничката Лидија Петкоска.Таа ги повика сите релевантни домашни и меѓународни организации да реагираат на оваа постапка на претседателот на ССМ.
Треба да се расчисти една работа, рече таа, а тоа е дека на јавно достапните снимки идентитетот на лицата е заштитен токму затоа што целта не се децата, туку расипништвото и неговите двојни аршини.
– Трендафилов е тој што ги злоупотребил своите деца како жив штит за да ги одбрани своите привилегии и комфорот ставајќи ги во возило што му припаѓа на македонскиот работник. Со вокабуларот на опозицијата, да, монструозно е да земаш плата од работниците за кои наводно се бориш додека ти уживаш во луксузот на сметка на ССМ и македонските работници – рече Петкоск, додавајќи дека Трендафилов е целосно нелегитимен претседател и оти тој е таму само за да си ја зачува фотелјата.
