Израел жестоко ќе го нападне Хезболах во Либан

Израел денеска соопшти дека ќе започне жесток напад врз цели на Хезболах во Либан, дополнително тестирајќи го кревкото примирје со земјата што американскиот претседател Доналд Трамп неодамна го продолжи за три недели.

Четири лица беа убиени во израелските напади врз јужен Либан во саботата, објави либанската државна новинска агенција, додека израелската војска соопшти дека Хезболах испукал ракети кон Израел, во најновото предизвикување на кревкото примирје.

Примирјето договорено од Израел и Либан доведе до значително намалување на непријателствата, но Израел и проиранската милитантна група Хезболах продолжија да се судираат во јужен Либан, каде што Израел ги остави своите војници во самопрогласена тампон-зона.

Во соопштението од канцеларијата на израелскиот премиер Бенјамин Нетанјаху се наведува дека армијата добила инструкции жестоко да ги нападне целите на Хезболах во Либан, но не се откриени други детали.

Американскиот претседател Трамп во четврток објави дека претставниците на Израел и Либан постигнале договор на состанок во Белата куќа за продолжување на примирјето за уште три недели.

Трамп, исто така, навести за претстојна средба во Соединетите Држави меѓу израелскиот премиер Бенјамин Нетанјаху и либанскиот претседател Џозеф Аун.

Примирјето, постигнато по разговорите меѓу амбасадорите на двете земји во Вашингтон минатата недела, требаше да заврши во недела.

Според либанските власти, речиси 2.500 луѓе се убиени во Либан откако Израел тргна во офанзива по нападот на Хезболах на 2 март.

Израел окупира појас на југ што се протега од 5 до 10 километри во Либан, тврдејќи дека сака да го заштити северен Израел од нападите на Хезболах, кој испука стотици ракети за време на војната.

Извор: fokus.mk