Димитријевиќ: Мицкоски повторно му диктира задачи на јавниот обвинител Савески

„Мицкоски повторно диктира задачи за јавниот обвинител. Имаме скандалозно признание на Мицкоски дека разговарал со јавниот обвинител Ненад Савевски, од позиција на премиер и му дал насоки како да постапува Обвинителството. Мицкоски вели, цитирам: „ако тоа не се случи, тогаш обвинителството дефинитивно го губи својот кредибилитет“. Што е ова? Чиста наредба. Како што правеше од собраниска говорница, како што прави од телевизија, сега повторно, нова наредба на Мицкоски за јавниот обвинител кој самиот го избра и го постави“ изјави денеска Александар Саша Димитријевиќ – генерален секретар на СДСМ.

Според него, „секој што се огрешил нека одговара, но не може премиерот да врши притисок врз обвинителот, односно да му наредува. Судството и обвинителството во Македонија се под целосна контрола на Мицкоски и неговата организирана криминална група. Затоа нема правда во Македонија и затоа нема реформи, затоа сме заглавени и со блокиран европски пат“.

„Мицкоски не ги исполнува реформите затоа што не сака независно судство, не сака Европско јавно обвинителство затоа што тоа би значело правда и крај на заштитата на криминалците на власт. Мицкоски елиминираше некои независни кандидати кои ги нарече „медиокритети“! Што е ова? Секој што нема да го исполни тоа што го бара, станува медиокритет и талог на општеството. Новиот јавен обвинител, Савески, откако е дојден на функцијата, работи по нарачка на Христијан Мицкоски. Мицкоски дава наредби – Савески исполнува“ рече Димитријевиќ и порача:

„Ако сака да сочува малку лично достоинство, најмалку што може да направи Савески е да си даде оставка, уште денеска“.