Откриена уште една гробница стара 3.000 години кај наоѓалиштето Луксор во Египет

Холандски археолози открија непозната гробница стара 3.000 години во близина на наоѓалиштето Луксор во Египет. Внатрешноста со натписи и ѕидни слики во боја открива дека гробот му припаѓал на човек по име Пасер, а приказите покажуваат религиозни обреди и патување во задгробниот живот. Гробницата датира од времето на Рамзес II и ерата на моќни фараони.

Врховниот совет за антиквитети на Египет неодамна објави дека гробот е пронајден во местото Шеик Абд Ел-Курна, и е дел од Тебанската некропола заштитена од УНЕСКО. Се работи за една од најважните гробници во Древен Египет, каде што биле погребувани свештеници и високи големци. Откритието е резултат на работата на холандска група археолози од Универзитетот на Лајден, предводена од Карина ван ден Ховен. Врз основа на стилот на украсувањето, тимот задолжен за ископување верува дека гробницата датира од времето на Рамзес II, приближно меѓу 1292 и 1069 година п.н.е.

Холандската мисија, во соработка со египетските власти, го ископува местото од 2018 година. Раководителот на Врховниот совет, Хишам ал Лејти најави продолжување на ископувањата.

– Тимот ќе продолжи да ја документира и проучува гробницата за да ги идентификува сите закопани таму и да го пресоздаде нивниот идентитет, рече ал Лејти.

Гробницата има класичен распоред на елитно погребување од Новото Кралство, со отворен двор што води до капела издлабена во карпа и подземни погребни комори. Археолозите пронајдоа и ѕид од калливи тули, којшто веројатно се користел за потпора на погребната стела, и скали што водат до влезот.

Внатре во гробницата се зачувани насликани прикази на Пасер, на пример како се поклонува на египетските богови. Така, една од сликите го прикажува како седи со својата сопруга на жртвена маса, а таквите слики биле наменети да му обезбедат на починатиот вечно снабдување со храна и пиење во задгробниот живот. Се очекува дека натамошната работа на конзерваторите ќе открие повеќе насликани прикази, откако ќе се отстрани слојот нечистотија од ѕидовите.