Писториус: Огромниот одбранбен буџет на Германија е посветеност кон безбедноста

Германскиот министер за одбрана Борис Писториус го опиша значителното зголемување на трошоците за одбрана од страна на неговата влада како „посветеност на безбедноста“, јави ДПА.

Писториус пред пратениците во Бундестагот денеска изјави дека 140-те милијарди евра наменети за буџетот за одбрана за следната година претставуваат „многу пари“ и дека е важна дебатата за приоритетите, исплатливоста и јавниот долг.

Безбедноста е основа на мирот, рече Писториус, додавајќи дека на следните генерации им  должат здрави јавни финансии, но пред сè земја што може да ја брани својата слобода и мир,  предупредувајќи дека Германија е „буквално на нишанот на Москва“.

Инцидентите, како што е осуетениот напад со беспилотни летала натоварени со експлозив во Лајпциг, вооружени руски борбени авиони во естонскиот воздушен простор и беспилотни летала над териториите на НАТО го покажуваат ова јасно, тврдеше тој.

„Русија се обидува да не шпионира, да влијае, да заплашува и да ги дестабилизира нашите општества и, пред сè, да ги вознемири луѓето“, изјави Писториус.

Русија, според него, троши половина од својот вкупен буџет за воени трошоци.

Руската војска треба да се прошири на 1,5 милиони војници и регрутирала нешто помалку од 30.000 странски војници од Северна Кореја и други земји низ целиот свет.

„Москва користи голем дел од својот буџет за да ги надополни своите залихи за идните конфликти, а не да ги испраќа на линијата на фронтот во Украина“, додаде Писториус.

„Од 150-те ракети со краток и среден дострел што Русија може да ги произведува секој месец, во просек само околу 80 се всушност истрелани во Украина“, додаде германскиот министер, пренесе ДПА.