Словенечката опозиција го тужи премиерот Јанша за спроведување „израелска надворешна политика“
Словенечкото опозициско Движење за слобода, заедно со партијата Левица, денеска поднесоа уставна тужба во парламентот против премиерот Јанез Јанша, обвинувајќи го дека води надворешна политика исклучиво во интерес на Израел.
Израелскиот шеф на дипломатијата Гидеон Саар денеска е во официјална посета на Љубљана, каде вечерва ќе ја отвори првата израелска Амбасада во Словенија.
Неговиот словенечки колега, Тоне Кајзер, по заедничката средба изјави дека „по долг период“ односите меѓу двете земји треба да се зајакнат, а соработката треба да се префрли на „повисока брзина“, објавува 24ur.
Кајзер е новиот шеф на словенечката дипломатија кој ја презеде функцијата во јуни, кога на власт дојде лидерот на неговата партија Јанез Јанша, словенечкиот политички ветеран.
СДС на Јанша и партнерите ја презедоа власта од премиерот Роберт Голоб, лидерот на Движењето за слобода кој владееше заедно со Левица. За време на неговиот мандат, Словенија ги критикуваше постапките на Израел во Газа, ја призна Палестина, ја забрани трговијата со оружје со Израел и увозот од окупираните територии.
Голоб денеска рече дека постапките на владата на Јанша покажуваат дека Словенија повеќе не спроведува суверена надворешна политика, туку работи исклучиво во интерес на Израел, пренесе СТА.
Поранешниот премиер рече дека пред 175 дена за првпат беше разоткриена вмешаноста на израелското разузнавање во внатрешните работи на Словенија.
Станува збор за аферата со разузнавачката компанија „Блек Кјуб“, која наводно стои зад тајно снимените, манипулираните и анонимно објавените разговори со истакнати членови на левиот центар пред парламентарните избори оваа година.
Јанша претходно призна дека се сретнал со функционер на „Блек Кјуб“, но негираше дека ја наредил операцијата, пишуваат француските медиуми.
Тој пред два дена во порака на Икс објави дека едноставно сака да „ја нормализира словенската надворешна политика и да ја поправи штетата“ што неговиот претходник наводно ја предизвикал на интересите на словенскиот народ.
Голоб верува дека „пријателството“ и бројните посети на израелски лобисти во Љубљана продолжиле од тоа откритие.
Покрај тоа, „Словенија за првпат го искористи ветото во интерес што не е словенечки, туку израелски“, продолжи Голоб. Словенија во август се спротивстави на заедничката изјава на ЕУ со која се осудува проширувањето на нелегалните израелски населби на Западниот Брег, пренесува СТА.
За да се усвои тужбата во Националното собрание се потребни 46 гласа, но опозицијата има само 40 претставници.
