САД пренасочуваат дел од парите наменети за воена помош за Европа кон Централна и Јужна Америка
Администрацијата на американскиот претседател Доналд Трамп пренасочува десетици милиони долари американска воена помош, наменети за земјите во Европа и Блискиот Исток, за поддршка на конзервативните влади во Централна и Јужна Америка.
Стејт департментот денеска го извести Конгресот дека ќе пренасочи 52 милиони долари од Фондот за странска воена помош, првично наменет за Словачка, Северна Македонија, Тунис и Ирак, кон Панама, Перу, Еквадор и Колумбија. Но, пренасочувањето не го елиминира финансирањето на воените потреби во Тунис, Ирак, Северна Македонија или Словачка.
Државниот секретар Марко Рубио минатата недела ги посети Колумбија, Еквадор и Перу и вети дополнителна поддршка.
– Средствата ќе бидат искористени за „борба против наркотероризмот во нашето непосредно соседство и за продолжување на обезбедувањето на Панамскиот канал. Овие средства ќе ги спречат противниците да воспостават стратешки упоришта на нашата хемисфера, се наведува во соопштението на Стејт департментот.
