Десет лавови пронајдени мртви во заштитено подрачје во Танзанија, се сомневаат на труење

Десет лавови се пронајдени мртви во заштитеното подрачје Нгоронгоро во Танзанија, познато како една од дестинациите за сафари-туризам. Според првичната истрага, постои сомнеж дека животните биле отруени.

Угинените лавови биле пронајдени во областа Ндуту, соопшти Управата на заштитеното подрачје Нгоронгоро. Властите започнале опсежна истрага и потрага по лицата кои би можеле да бидат одговорни.

Во Танзанија и во други африкански земји често доаѓа до судири меѓу дивите животни и локалното население што живее во близина или во заштитени подрачја. Лавовите понекогаш се убиваат како одмазда по напади врз добитокот.

Дополнителен проблем претставуваат загубата на природните живеалишта, како и борбата за вода и пасишта. Во заштитеното подрачје Нгоронгоро живее и народот Масаи, кој традиционално се занимава со сточарство и се движи со своите стада.

Подрачјето Нгоронгоро е запишано на листата на светско наследство на УНЕСКО.

Извор: skopje1.mk