ДПА: Иран навестува разговори додека САД ја оставаат отворена вратата за средба меѓу Трамп и Пезешкијан
Иранските власти денеска упатија претпазливи навестувања за дипломатски напори во конфликтот со САД, иако не покажа подготвеност за брзи попуштања, јави ДПА.
– Дипломатијата не значи капитулација, туку претворање на силата од теренот во политички достигнувања – изјави главниот преговарач и претседател на парламентот, Мохамед Багер Галибаф, во Техеран, пренесуваат иранските медиуми.
Галибаф, кој се смета за конзервативен прагматичар, се чини дека зазема попомирувачки тон. Напротив, тврдокорните струи во иранското раководство неодамна изгледаа самоуверено и подготвено да ризикуваат воена ескалација.
Сепак, Галибаф не даде никакви индикации дека Техеран е подготвен брзо да ги ублажи своите барања.
Обраќајќи му се на американскиот претседател Доналд Трамп, тој рече: „Тој мора да знае дека не може да му ја наметне својата моќ на иранскиот народ и на вооружените сили“.
Во меѓувреме, американскиот државен секретар Марко Рубио не ја исклучи можноста за евентуална средба меѓу Трамп и иранскиот претседател Масуд Пезешкијан на маргините на Генералното собрание на ОН во Њујорк оваа недела.
На прашање од Фокс Њуз дали двајцата лидери ќе се сретнат, Рубио изјави дека Трамп е отворен за средба со Пезешкијан или со кој било друг.
Трамп е бизнисмен кој доаѓа од „свет на практичност и здрав разум“, рече Рубио, додавајќи дека „нема никаква штета“ од ангажирањето во разговор со некого.
Предвидено е Трамп денеска да се обрати пред Обединетите Нации, додека Пезешкијан треба да говори утре.
Набљудувачите шпекулираат за можни средби меѓу иранската делегација и посредниците или претставниците на американската влада, додека војната меѓу САД и Иран се приближува кон својот седми месец.
