(ВИДЕО + ГАЛЕРИЈА) Луксузниот 50-ти роденден на кумот на Вучиќ во Венеција: Три дена гламур, чартер-летови и милионски трошоци
Додека просечниот граѓанин на Србија се бори со секојдневните поскапувања, долговите и извршителите, политичката и бизнис-елита блиска до власта на Српската напредна партија (СНС) уште еднаш ја покажа својата моќ и луксуз.
Педесеттиот роденден на Никола Петровиќ, кумот на претседателот на Србија, Александар Вучиќ, и поранешен директор на „Електромрежа Србије“, бил одбележан со тридневна прослава во Венеција, еден од најскапите и најексклузивните градови во Европа.
Според наводите што предизвикаа реакции во српската јавност, организацијата на оваа прослава чинела неверојатни три милиони евра.
За превоз на гостите од Белград, наводно биле организирани дури два чартер-летови на компанијата „Ер Србија“, додека дополнителен број приватни авиони ги превезувале најмоќните претставници на политичката и деловната елита, меѓу кои и министри од српската влада, како и директори на државни агенции и јавни претпријатија.
Луксузни хотели, приватни водени такси и вечери во историски палати
Гостите во Венеција биле пречекувани со приватни водени такси и сместени во ексклузивни хотели, а дел од свеченостите и гламурозните вечери биле организирани во историски венецијански палати.
Централно место во престојот на гостите имал луксузниот хотел The St. Regis Venice, познат по својата престижна локација покрај Големиот канал (Canal Grande), со поглед кон прочуената црква Santa Maria della Salute.
Хотелот располага со луксузни апартмани и е познат по својата ексклузивна понуда. Според наводите во текстовите за оваа прослава, цените на одредени апартмани со поглед кон Големиот канал достигнуваат и до 6.000 евра за ноќевање.
Естрадни ѕвезди за забава на политичката и бизнис-елита
За музичката програма, според објавените наводи, биле ангажирани познати пејачи од Србија и регионот. Меѓу нив се споменуваат Ацо Пејовиќ, Саша Матиќ, Петар Грашо и Марија Шерифовиќ.
Присуството на познати музички имиња, луксузниот превоз и ексклузивното сместување ја претвориле прославата во настан кој привлече внимание во српската јавност и отвори прашања за размерите на богатството и начинот на живот на луѓето блиски до политичката власт.
Две Србији: секојдневна борба за преживување наспроти луксузот на елитата
Овој настан повторно ја отвори дебатата за длабоките социјални и економски разлики во Србија. Од една страна, голем број граѓани се соочуваат со растечки трошоци за живот, ниски примања и финансиска неизвесност. Од друга страна, луѓето од највисоките политички и деловни кругови можат да си дозволат прослави во ексклузивни европски дестинации, со приватни авиони, луксузни хотели и настапи на најпознатите регионални музички ѕвезди.
Особено чувствително прашање е фактот што Никола Петровиќ е долгогодишно поврзан со претседателот Александар Вучиќ, а во минатото ја извршувал и функцијата директор на „Електромрежа Србије“.
Прославата на 50-тиот роденден во Венеција стана симбол на јазот меѓу животот на обичните граѓани и начинот на живот на елитата блиска до власта.
За критичарите на режимот на СНС, ваквите настани ја отсликуваат концентрацијата на моќ и богатство во круговите поврзани со владејачката структура.
Луксузот на до вчера српската владејачката елита: Вино што наводно чини и до 30.000 евра за шише
Луксузниот начин на живот на дел од елитата до Српската напредна партија (СНС), според критичарите на власта, достигнува размери што тешко можат да се замислат дури и во круговите на најбогатите луѓе во светот.
Посебно внимание привлекуваат приказните за љубовта на претседателот на Србија, Александар Вучиќ, кон скапите вина.
Во политичките и деловните кругови се шират тврдења дека тој, наводно преку други лица, има врски со неколку лозја, како и дека во неговото опкружување се консумираат вина со исклучително високи цени.
Според неофицијални тврдења што кружат во неговиот најблизок круг, едно шише вино што наводно се служи може да чини и 20.000 до 30.000 евра.
Ваквите тврдења отвориле дополнителни прашања за потеклото на средствата, деловните врски и вистинските размери на луксузот во круговите блиски до српската напредна партија (СНС).
