Малолетникот кој нападна жандарм во Белград во мај бил уапсен во Минхен под сомнение дека подготвувал терористички напад, а во јули бил депортиран во Србија

Малолетникот кој беше убиен по нападот врз припадник на полицијата пред израелската амбасада во Белград, Србија, претходно бил уапсен во Минхен, Германија, поради сомнение дека подготвувал терористички напад, според сознанијата на „Н1“, тој бил приведен во мај годинава, а во јули бил депортиран во Србија.

За време на испрашувањето од германските власти, малолетникот раскажал дека преку интернет почнал да следи содржини поврзани со исламскиот фундаментализам и терористичките организации Ал Каеда и Исламска држава. По воспоставувањето контакт со непознато лице во Германија, наводно започнал да планира напад врз еврејската заедница во Минхен.

По неговото враќање во Србија, останува нејасно зошто безбедносните служби, вклучително и БИА, не го следеле неговото движење, со оглед на претходните сомневања против него. „Н1“ побара одговори од српското Министерство за внатрешни работи и од БИА.

Во меѓувреме, српските власти го подигнаа нивото на безбедносна закана од тероризам на највисоко, црвено ниво, по нападот врз полицаецот кој ја обезбедувал израелската амбасада во Белград.

Министерот за внатрешни работи во технички мандат, Ивица Дачиќ, соопшти дека нападот се случил 15 минути по полноќ. Според неговите информации, малолетникот извикал „Алаху акбар“ и со два ножа го нападнал полицискиот службеник.

Напаѓачот бил застрелан од припадник на Жандармеријата, кој постапил во самоодбрана. При интервенцијата, и полицаецот се здобил со полесна повреда на лицето. Истрагата за случајот е во тек, а српските власти најавија засилено полициско присуство на клучните локации во земјата.