Авганистански и претставници на ОН тврдат дека во пакистанските напади загинале тројца цивили

Најмалку тројца цивили се убиени, а четворица други се повредени во пакистанските воени воздушни напади врз Авганистан, соопштија денеска Обединетите нации и авганистанските претставници, пренесува ДПА.

Мисијата за помош на ОН во Авганистан (УНАМА) соопшти дека меѓу жртвите убиени во авганистанската покраина Кунар се маж, жена и девојче.

Министерството за информации на Пакистан соопшти дека за време на операцијата во неделата биле погодени три цели во пограничниот регион со Авганистан, додавајќи дека 28 терористи се убиени.

Нападите се случиле во покраините Нангархар, Кунар и Пактика, изјавија за ДПА пакистански безбедносни извори. Изворите велат дека целта биле скривалиштата на пакистанската талибанска група со седиште во пограничните покраини, која наводно стои зад смртоносните прекугранични бомбашки напади во последните месеци.

Портпаролот на талибанската влада, Забихулах Муџахид, ги осуди пакистанските напади и вети соодветен одговор.

„Ја осудуваме оваа агресија и неправда и ја сметаме за повторување на ваквите злосторства“, рече Муџахид во соопштението, обвинувајќи го воениот естаблишмент на Пакистан дека ги извршил нападите за да го одвлече вниманието од безбедносните пропусти во земјата.

Воздушните напади во текот на ноќта следеа по петочниот напад на милитантите врз комплексот на полициската станица во Кохат, во северозападен Пакистан.

За координираниот напад, во кој загинаа најмалку 22 лица, одговорноста ја презеде Итехад-ул-Муџахидин Пакистан, локална исламистичка коалициска фракција поврзана со Техрик-е-Талибан Пакистан (ТТП).

УНАМА го повтори својот повик за строго почитување на меѓународното хуманитарно право и рече дека досега годинава документирала повеќе од 1.100 цивилни смртни случаи и повреди низ Авганистан, кои се припишуваат на прекугранично вооружено насилство.