Десет лица повредени по напад на украински дрон врз Крим

Украински дрон денеска повреди десет цивили во источниот дел на полуостровот Крим, соопштија руските власти.

Дронот погодил петкатна станбена зграда во градот Керч околу 14 часот, изјави Олга Курлаева, советничка на Сергеј Аксјонов, гувернерот на регионот именуван од Москва.

На третиот и четвртиот кат избил пожар, а меѓу повредените има и едно дете, напиша Курлаева на Телеграм, пренесе ДПА.

Рускиот претседател Владимир Путин го анектираше Крим уште во 2014 година и од 2022 година го користи полуостровот како полигон и база за снабдување за неговата војна против Украина.

Украинската војска често напаѓа цели на Крим, неодамна фокусирајќи се на енергетските објекти, што сè повеќе резултира и со цивилни жртви на полуостровот.

Сепак, обемот на штетата и бројот на жртвите се непропорционални во споредба со разурнувањето што го предизвикува Русија.