Додик призна дека го прислушувале американскиот амбасадор: Само „кликнуваме“ и го слушаме

Членот на Претседателството на БиХ, Милорад Додик (СНСД) синоќа во Брчко од говорницата изјави дека неговата влада „знае што прави американскиот амбасадор во БиХ“, односно дека тој всушност е прислушуван – „со еден клик“.

-Малку вежбавме, па сега и нив ги слушаме. Тие не слушаат само нас. Знам јас што тие зборуваат. Тоа не беше можно пред само пет или шест години. Не сме смееле да помислиме да го слушаме американскиот амбасадор, а ние само „кликнуваме“. И знаеме што прави. Ние сме државата, рече Милорад Додик во средата вечерта на предизборниот митинг на СНСД.

Ова не е првпат Додик јавно да каже дека неговите параполициски и параразузнавачки служби водат специјални истраги.

Така, во мај 2020 година, во зградата на Народното собрание на РС, во присуство на министерот за полиција Драган Лукач, тој рече дека ги „слушале“ Драшко Станивуковиќ и остатокот од опозицијата. По бројните реакции на таа изјава, Додик изјави дека тоа е само настап.

Изјавата на Додик за прислушувањето на американските дипломати доаѓа само еден ден откако Вашингтон, меѓу другото, откри дека пред изборите во 2018 година, рускиот олигарх Константин Малофеев тајно помагал во финансирањето на претседателската кампања на Милорад Додик.