Готвач на Путин , шеф на платениците и сега лидер на бунтот ! Eве кој e Евгениј Пригожин, „најдобриот“ пријател на Владимир

Евгениј Пригожин (62) своевремено го добил прекарот „готвачот на Путин“, бидејќи често го послужувал рускиот претседател во неговиот ресторан.
Конфликтот меѓу московското воено раководство и Евгениј Пригожин, шефот на приватната платеничка група Вагнер, драматично прерасна во отворен бунт! Неговите војници синоќа маршираа во рускиот град Ростов, а домашната разузнавачка служба на Русија, Федералната служба за безбедност, позната како ФСБ, отвори кривична постапка против Пригожин, обвинувајќи го за „поттикнување вооружен бунт“. Исто така, Владимир Путин и се обрати на нацијата и во таа прилика рече дека бруталниот напад е обид за внатрешна дестабилизација: „Ова е еднакво на вооружен бунт, Русија ќе се брани“.

Пред неколку дена Пригожин отворено ја обвини руската армија дека го нападнала неговиот камп и ги убила неговите луѓе. Тој вети дека ќе возврати со сила: „Ние сме 25.000 и ќе дознаеме зошто е толкав хаос во земјата. Ова не е воен удар, ова е марш за правда. Борците и јас ќе го уништиме секој што ни стои на патот“, рече тој.

Кој е Евгениј Пригожин?

Роден во Ленинград, сегашен Санкт Петербург, во Советскиот Сојуз во 1961 година, Пригожин поминал дел од својот ран живот во затвор откако бил осуден за грабеж и измама. По излегувањето од затвор во 1990 година, по девет години притвор, Пригожин почнал да продава виршли на пазарите во неговиот роден град. Тој изјави за Њујорк Тајмс во 2018 година, „алиштата се трупаа побрзо отколку што мајка ми можеше да изброи“. И како што падна Советскиот Сојуз, Пригожин основаше неколку бизниси.

Евгениј Пригожин (62) најпрво се прослави како сопственик на угостителски компании и ресторани и како снабдувач на храна и пијалоци за официјални настани во Кремљ. Една од неговите најпознати фотографии е како му служи храна на рускиот претседател. Потоа го доби прекарот „готвачот на Путин“.

И Евгениј Пригожин и Владимир Путин се од Санкт Петербург, вториот по големина град во земјата, и се познаваат долго време, можеби од 1990-тите, кога Путин работеше во кабинетот на градоначалникот на Санкт Петербург и го посети Ресторанот на Пригожин, популарен меѓу локалните власти.

Угостителскиот бизнис на Пригожин процвета, проширувајќи се на владини тендери за снабдување со храна во училиштата, градинките и, на крајот, војската – договори вредни повеќе од 3 милијарди долари, според истрагата на Фондацијата за борба против корупцијата, основана од рускиот опозициски политичар Алексеј Навални.

После тоа, Пригожин беше поврзан со групата Вагнер, но Пригожин со години негираше какви било врски со паравоената група Вагнер, па дури и ги тужеше оние кои тврдеа дека тој ја основал. Вагнер првпат се појави во источна Украина во 2014 година, каде им помогна на проруските сепаратисти да воспостават контрола над украинската територија и да основаат две отцепени републики во регионите Доњецк и Луганск.

По 2014 година, Вагнер учествуваше во неколку војни ширум светот, особено во Сирија и бројни африкански земји. Пријавено е дека групата учествува во воени операции во замена за пристап до природните ресурси. На пример, во Сирија, групата наводно ги чувала нафтените полиња контролирани од сириската влада и добивала процент од своите приходи поради тоа.

Формално гледаано, Евгениј Пригожин нема никаква улога во официјалниот руски естаблишмент. Сепак, обемот на неговото влијание е очигледен. Воени експерти изјавија за Би-Би-Си дека софистицираноста на оружјето што борците на Вагнер го користат во Либија е над она што е достапно на пазарот и може да се добие само преку владини врски на највисоко ниво.

Во март минатата година, веднаш по почетокот на руската инвазија, американските власти соопштија дека најмалку 1.000 нивни платеници биле испратени да се борат во источна Украина.

„Знаеме дека се таму. И знаеме дека сакаат да го зголемат своето присуство во Украина“, изјави  портпаролот на Пентагон Џон Ф. Кирби,

Подоцна, Пригожин почнал да ги посетува руските затвори за да регрутира осуденици да се борат во Украина. Тоа исто така не можеше да се случи без дозвола од највисокото ниво. Тој ги повика затворениците да излезат, велејќи им дека општеството ќе ги почитува – и лежерно ги предупреди да не вршат нови злосторства, како што е силувањето. „Не се опивајте, не се дрогирајте, не силувајте, однесувајте се“, рече тој.

Тој вети дека регрутите ќе мора да останат на фронтот шест месеци, по што ќе бидат на слобода – и ќе се вратат дома и ќе им бидат исчистени досиејата од осудите. Неодамна, еден таков поранешен затвореник, осуден за убиство, всушност се врати од војната. Украинската војска, сепак, тврди дека Вагнер ги користи луѓето како топовско месо и дека многу негови борци се убиени, а неодамна во жестоки борби околу источните украински градови Соледар и Бахмут.