Хамас ги објави имињата на четири израелски жени војници кои ќе ги ослободи утре

Палестинската исламистичка организација Хамас денеска, во согласност со договорот за прекин на огнот во Појасот Газа, објави имиња на четири припаднички на израелската армија кои утре ќе ги ослободи како дел од вториот круг на размена на нејзини затвореници за Палестинци од израелските затвори.

– Како дел од размената на затвореници, бригадите Изад-Дин ал-Касам одлучија в сабота да ослободат четири жени војници, соопшти портпаролот на военото крило на Хамас, Абу Обеида на Телеграм.

Кабинетот на израелскиот премиер Бенјамин Нетанјаху потврди дека добил список на заложници кои би можеле да бидат ослободени преку посредник, но детали не се соопштени.

Не е познато колку палестински затвореници ќе бидат ослободени од израелските затвори во замена за четирите заложнички кои се држат во Газа од 7 октомври 2023 година, пренесува Бета.

Израелските медиуми јавија дека израелскиот премиер Бенјамин Нетанјаху се консултира со министерот за одбрана Израел Кац и шефовите на безбедносните служби за тоа како да одговорат на списокот со планираните за ослободување што го објави Хамас.

Договорот за прекин на огнот, наводно, бара од Хамас да ги ослободи сите цивили од заробеништво, пред да ги ослободи женските припадници на израелската армија, постарите и болните заложници. Во средата беше објавено името на една од цивилките кои се очекува да бидат ослободени.

Сега се смета дека неа ја држи друго палестинско движење, Исламски џихад, наместо Хамас, што предизвика загриженост кај израелските власти дека нејзиното ослободување ќе биде одложено.

„Тајма оф Израел“ пишува дека Израел има неколку опции како да одговори на списокот заложници планирани за ослободување, вклучително и откажување на дозволата за Палестинците да се вратат во северна Газа утре или ограничување на бројот на заробеници што треба да се разменуваат.

Извор близок до Хамас најави дека заложниците ќе му бидат предадени на Меѓународниот комитет на Црвениот крст, но не беше соопштено во кое време.

Во првата фаза од прекинот на огнот, кој почна во неделата и ќе трае 42 дена, треба да бидат ослободени 33 заложници од Газа во замена за 1.900 Палестинци кои се наоѓаат во израелски затвори.

Со трите млади жени ослободени минатиот викенд во замена за 90 палестински затвореници, а за утре е закажано ослободувањето на уште четири жени војници, ќе останат 26 заложници кои можат да бидат ослободени во оваа прва фаза. Имињата на заложниците беа претходно предадени, но не и наредбата за нивно ослободување.

Во терористичкиот напад на Хамас врз јужен Израел на 7 октомври 2023 година, на израелска страна беа убиени околу 1.200 луѓе, главно цивили, а 251 заложник беа киднапирани и однесени во Газа, од кои 91 се уште се таму.

Според воени податоци, 34 заложници повеќе не се живи. Хамас соопшти дека и некои други се мртви, но Израел не го потврди тоа.

Како одмазда за нападот на палестинските екстремисти, Израел веднаш почна разорна офанзива во опколениот Појас Газа, во која загинаа повеќе од 47.000 луѓе, главно цивили, соопшти локалното Министерство за здравство.