Илјадници Романци на проевропски протест пред вториот круг од претседателските избори

Илјадници луѓе излегоа на улиците во Букурешт и други градови во Романија денеска за да изразат поддршка за Европската Унија пред вториот круг од претседателските избори што ќе се одржи подоцна овој месец, пренесе ДПА.

Во центарот на романската престолнина, толпата мавташе со знамиња на ЕУ и извикуваше слогани како „Романија гласа, Европа брои“ и „Русија нè загрозува – ЕУ нè штити“, според локалните медиуми.

Во вториот круг на изборите на 18 мај, евроскептикот и националист Џорџе Симион ќе се соочи со центристичкиот градоначалник на Букурешт, Никушор Дан. Во првиот круг на 4 мај, Симион освои речиси 41 отсто од гласовите, додека Дан доби нешто под 21 отсто. Дан е застапник за цврсто вкотвување на Романија, членка на ЕУ, во европските институции и НАТО, додека Симион се залага за прекин на целата помош за Украина во нејзината борба против руската инвазија.

Според медиумските извештаи, дополнителни демонстрации се одржаа во западните романски градови Тимишоара, Клуж и Арад, меѓу другите.