Кузеска: Кога истрагата е селективна, а обвинителот станува подобен за Мицкоски, правда не може да се очекува

„Страшната трагедија во Кочани, во која загинаа 59 луѓе, повикува на неселективна и темелна истрага за лоцирање на одговорност. За жал, од досегашниот тек на истрагата гледаме дека се води селективно и не се опфатени актуелните функционери и службеници, иако биле на функции на денот кога се случила трагедијата. Како тоа тие што се директно одговорни за безбедноста на самиот настан, во БЈБ и МВР, во ОВР Кочани и Штип како е можни тие да не се опфатени со истрагата?“ праша на прес-конференција портпаролката на СДСМ, Богданка Кузеска.

Според неа, „Доколку институциите постапеле согласно своите законски обврски, на терен ќе имало присуство на Противпожарна бригада, Брза помош, адекватен број полициски службеници и сите неопходни безбедносни протоколи за ваков тип јавен собир. Се поставува прашањето како е можно да не се истражуваат лица кои вечерта биле на одговорни позиции со законска должност да постапат – но не го сториле тоа? Понатаму, зошто актуелните директори на ДПИ и на УЈП не се опфатени со истрагата?

Истражниот процес, кој мора да биде непристрасен и целосен, се претвора во инструмент на политичко калкулирање. Се заштитуваат позиции, се менуваат стратегии“.

„Пред само неколку недели, јавниот обвинител беше под притисок за разрешување и тоа директно од Мицкоски. Владата започна постапка, се вршеа јавни напади, се создаваше јасен наратив за негова недоверба. Одеднаш пресврт, станува „потребен“ – постапката е стопирана, Советот за јавни обвинители не заседава, а Мицкоски повикува да му се даде шанса. Кога обвинителот од неподобен станува подобен, а истрагата ги допира само оние од минатото тогаш е јасно дека неселективна правда не може да се очекува“ рече Кузеска и порача:

„СДСМ нема да молчи. Ние нема да го оставиме јавниот интерес во рацете на политичари што правдата ја испорачуваат според нивната политичка потреба“.