Неколку минути пред несреќата авионот добил предупредување за опасност од удар со птици

Официјални лица во Министерството за транспорт на Јужна Кореја открија критична секвенца од шест минути пред несреќата, пишува Yonhap News.

Во 8:57 часот, контролорите на летање го предупредиле авионот дека се приближува кон опасност од судир со јато птици. Една минута подоцна, во 8:58, пилотот прогласил „мајдеј“. Авионот се обидел да слета во 9:00 часот, а се урнал во 9:03 часот.

Еден од двајцата преживеани членови на екипажот, наводно, ги потврдил првичните теории за причината, кажувајќи им на спасувачите веднаш по извлекувањето од остатоците на леталото, дека авионот удрил во птици, известиле пожарникарите.

Министерството за транспорт потврди дека инспекторите го пронашле рекордерот со податоци за летот, додека снимачот на глас од пилотската кабина се уште се бара.

Националната полициска агенција испрати 169 форензичари за да помогнат во идентификувањето на жртвите. Дополнително, ангажирани се 579 полициски службеници кои помагаат во потрагата и ги придружуваат возилата на брзата помош до местото на несреќата.