Париз ги осуди „неселективните“ напади во ирачки Курдистан

Франција ги осуди „ неселективните “ ирански напади во ирачки Курдистан, кои беа насочени кон вооружените групи на иранската курдска опозиција кои ја осудуваат репресијата на демонстрациите во Исламската Република, јави дописникот на МИА.

„Франција ги осудува масовните напади за кои одговорноста ја презема Иран, извршени во автономниот регион Курдистан, со флагрантно кршење на ирачкиот суверенитет и меѓународното право, кои неселективно ги погодија цивилите“, се вели во соопштението на француското Министерство за надворешни работи.

Франција повикува на почитување на суверенитетот, територијалниот интегритет на Ирак и стабилноста и безбедноста на автономниот регион Курдистан во него, се додава во текстот. Овие напади оставија „13 мртви – вклучително и бремена жена – и 58 повредени, повеќето од нив цивили, вклучително и деца помлади од десет години“, објавија во средата антитерористичките служби на Ирачки Курдистан.