Пендаровски и Владата да го поддржат законот за здруженија и фондации предложен од ВМРО-ДПМНЕ, повика Мицкоски

11.10.2022 15:31

182 Читање помалку од 1м

Лидерот на ВМРО-ДПМНЕ, Христијан Мицкоски денеска ги повика Владата и претседателот на државата, Стево Пендаровски да дадат поддршка на предлог-измените на Законот за здруженија и фондации што опозициската партија ги достави во Собранието, со цел, како што рече денеска во Прилеп, да се стави крај на провокациите.

„Ја користам оваа прилика и до Пендаровски и до Владата да упатам апел да се поддржи законот и да се стави крај на овие провокации – изјави Мицкоски, одговарајќи на новинарски прашања при денешната посета на Прилеп.

Тој притоа обвини дека власта три месеци ја лажела македонската јавност за измените на овој закон.

„Три месеци ја лажат македонската јавност дека ќе предложат закон и не видовме предлози, а клубови на соседни држави кои што носат имиња на докажани фашисти се отвораат низ Македонија. Зедовме и ние предложивме и очекуваме поддршка од Владата или да кажат барем што е тоа што треба да се дополни во тој закон што не им одговара да го прифатат – рече Мицкоски.

Пратеничката група на ВМРО-ДПМНЕ во петокот, минатата недела, денот на отворањето на бугарскиот клуб „Цар Борис Трети“ во Охрид, до Собранието достави нивен предлог за измени на Законот за здруженија и фондации.

Истиот ден од Министерството за правда соопштија дека е формирана работна група за изготвување на нов закон за здруженија и фондации, со кој ќе се доуредат условите врз основа на кои ќе може да се регистрира здружение.

Оттаму информираа дека законот ќе биде објавен на ЕНЕР до крајот на овој месец.