По оставката на Џонсон, ЕУ најави дека ќе продолжи да бара решенија за Северна Ирска

 Најавеното заминување на британскиот премиер Борис Џонсон не ја менува решеноста на ЕУ да бара решенија за спорот околу царинските одредби по Брегзит во Северна Ирска, соопшти денеска Европската комисија.

Запрашан непосредно пред Џонсон официјално да ја објави својата оставка како лидер на Конзервативната партија и ќе остане додека не се избере неговиот наследник, портпаролот на ЕК Даниел Фери рече дека политичките случувања нема да ја променат позицијата на ЕУ за протоколот, соработувајќи со британските власти и Северна Ирска.

„Нашиот став е да бараме решенија во однос на имплементацијата на протоколот и тоа е се, тоа нема да се промени”, додаде тој. Тој рече дека постапката против Лондон во септември 2021 година за прекршување на протоколот за Северна Ирска се уште е во тек.

Британскиот премиер Борис Џонсон денеска поднесе оставка, велејќи дека тоа е „јасна волја” на неговата Конзервативна партија.

Протоколот за Северна Ирска беше договорен меѓу Лондон и Брисел како дел од нивниот Договор за повлекување за решавање на чувствителното прашање на границата меѓу Северна Ирска, која е дел од Велика Британија, и Република Ирска, членка на ЕУ.

Тој беше дизајниран да исполни двојна цел, да го заштити интегритетот на европскиот единствен пазар и да избегне копнена граница што може да го наруши мирот постигнат во 1998 година.

За да се реши ова, владата на Џонсон прифати дека Северна Ирска де факто треба да остане во рамките на европскиот пазар со воспоставување на царинска граница во Ирското Море со контроли и царински формалности.