Претседателот на државата треба да се бира на непосредни избори, вели Ковачевски за барањето на ДУИ тоа да биде во Собранието

Ковачевски вели дека во текот на кампањата се кажуваат многу работи и додава дека ова барање не е ново.

„Тоа што ДУИ смета дека мора да се прави, тие тоа може да си го кажуваат на нивните митинзи, меѓутоа суверено право е на демократските институции, а тоа е Парламентот во овој случај, да одлучува за тоа како ќе функционира државата. Ние имаме уставно уредување во коешто претседателот на државата се бира од страна на граѓаните“ рече Ковачевски.

Според него, овој начин на избор е најдобар и додава дека така и ќе продолжи да биде во иднина.

„Претседателот на државата треба да се бира на непосредни избори бидејќи претседателот на државата треба да биде независна интегритетна фигура којашто ќе биде коректив на политичките партии, којшто ќе ги претставува сите граѓани, а не да ги претставува политичките партии. Токму таков е претседателот Стево Пендаровски“ вели Ковачевски во интервју за МИА.

Ковачевски вели оти изборот на шеф на државата на непосредни избори е потребно затоа што претседателот на работите во државата гледа од, како што рече, пограѓански аспект.

„Со претседателот Пендаровски сме имале прашања за кои не сме се согласувале. Тоа можеби мене не ми било многу драго, меѓутоа сум го почитувал неговото мислење со оглед на тоа што тој своите одлуки ги носи врз основа на едно пошироко гледање на работите, од многу пограѓански аспект, а не од дневно-оперативен менаџмент како што Владата функционира. Затоа сметам дека овој начин на избор е најдобар“,рече Ковачевски.

Во однос на ДУИ, Ковачевски рече дека изминатите седум години, колку што биле во коалиција, успеале да обезбедат членство на државата во НАТО и почеток на преговори со ЕУ.

„Партијата ДУИ е голема партија, тие беа со нас во коалиција седум години. Во тие седум години успеавме да обезбедиме членство на државата во НАТО, успеавме да обезбедиме почеток на преговори со ЕУ и успеавме да се справиме со пандемијата, економската и енергетската криза. Многу блиску соработував со министрите од сите политички партии, тука пред сè мора да ги истакнам министрите од економските ресори, кои дел беа од СДСМ и дел од ДУИ кои навистина на високо ниво, професионално си ја извршуваа својата работа“,

додаде Ковачевски.Лидерот на Демократската унија за интеграција (ДУИ), Али Ахмети за иницијативата на ДУИ за изборот на претседател на државата да се врши во Собранието, вели дека не е нова, туку дека датира од нивните програми од 2016 и 2020 година.

Изборот на шеф на државата, но и негов заменик во парламентот со двотретинско и Бадентерово мнозинство, како што вели лидерот на ДУИ, би продуцирал стабилност и зближување на граѓаните. Со овој чекор, како што додаде, ќе се заштедат и пари од Буџетот зашто за еден изборен циклус се трошат повеќемилионски суми.

Потпретседателот и портпарол на Демократската унија за интеграција, Арбр Адеми вели дека ако се пристапи рационално кон ова прашање, разумно е сите политички партии да се согласат со ова.

Партискиот потпретседател уште еднаш повтори дека Али Ахмети уште во 2009 година на вториот изборен Конгрес на ДУИ во Скопје наброил 12 позиции, за кои како што рече Адеми, тогаш биле недостижни за Албанците, меѓу кои и претседател на државата.

Заменикот на претседателот на Владата, задолжен за координација на политички прашања на ресорите, Артан Груби соопшти дека ако кандидатот на ДУИ, Бујар Османи отпадне во првиот круг, условот за поддршка во вториот круг од претседателските избори е прифаќање на програмската определба на ДУИ, шефот на државата да се избира во Собрание.

Претседателот Стево Пендаровски својот став за идејата шефот на државата да се бира во Собранието, наместо на избори, го искажа кога ја поднесе кандидатурата за втор мандат. Тој тогаш рече дека е далеку подобро да се има претседател кој е независен во однос на политичките субјекти, па и во однос на економските центри на моќ, кога е избран на општи избори, отколку да е избран во парламент.