Путин: Глобалниот поредок се урива, доаѓа нова ера

Рускиот претседател Владимир Путин денеска изјави дека западните земји ги губат своите лидерски позиции и им отстапуваат место на нови центри за раст и земји од Глобалниот Југ, и дека земјите што ја поддржуваат нивната сувереност во клучните области играат важна улога во оваа архитектура.

Во видео обраќање до учесниците на форумот „Отворен дијалог“, тој рече дека претходните пристапи, како и воспоставените норми и правила на деловниот живот и меѓународните односи, постепено ја губат силата, вклучително и поради постапките на западните земји што ги губат своите лидерски позиции, пренесува „Спутник“.

Според него, „сите елементи на глобалниот раст, од економијата и финансиите до технологијата и демографијата, се менуваат неповратно и во моментов се формира мултиполарна архитектура на глобалниот развој“.

Тој нагласи дека ниедна земја не може да се развива сама, на сметка на другите земји или на нивна штета.

„Моделот на глобалниот развој ќе биде одржлив и фер само ако се базира на принципите на еднаквост и меѓусебно почитување и ги зема предвид интересите на сите земји“, додаде Путин.

Националниот центар „Русија“ е домаќин на форумот за отворен дијалог „Иднината на светот: Нова платформа за глобален раст“ од 27 до 29 април.Целта на овој форум е да се обликува визија за идниот глобален развој преку експертска соработка, а оваа година учествуваа претставници од повеќе од 120 земји