Симболични акции против насилството врз жените во 17 хрватски градови
Женските организации и иницијативи денеска одржаа симболични јавни акции во 17 хрватски градови под слоганот „Додека министерот фрла светлина, жените остануваат во темнина“ во пресрет на Националниот ден за борба против насилството врз жените.
Акциите се насочени против празнините во институционалната заштита на жртвите на насилство и случаите на фемицид.
Протестните акции беа поттикнати од убиството на 35-годишна жена во Слатина на 8 септември. Жената го пријавила својот сопруг во полиција на 21 јули за закани, семејно насилство и повреда на правата на детето. Откако го пријавила, тој бил уапсен, а против него била издадена забрана за приближување, следење и вознемирување, а тој бил отстранет од нивниот дом. Некои од мерките подоцна биле укинати на барање на жртвата, но забраната за приближување од прекршочната постапка останала во сила. На денот на убиството, жената повторно се јавила во полиција поради семејно насилство. Полициска патрола пристигнала околу десет минути подоцна, но не го пронашла осомничениот на адресата. По дваесет минути подоцна полицијата добила пријава за убиството.
Министерот за труд, пензиски систем, семејство и социјална политика, Ален Ружиќ два дена по убиството тврдеше дека нема индикации за системски пропусти. Но, полицијата утврди неправилности.
– Сакаме да предупредиме за системските празнини што водат до ескалација на насилството врз жените и фемицидот. Сакаме системски решенија, изјави извршна координаторка на Хрватската женска мрежа, Сања Јурас.
Учесниците побараа единствена и задолжителна процена на ризикот од повторено насилство и фемицид, специјализирана обука за службениците, кои го проценуваат ризикот и одлучуваат за мерките за заштита, како и подобра координација помеѓу полицијата, социјалните служби и обвинителството.
Женските организации, исто така, побараа посебен закон против сите форми на родово базирано насилство, ефикасно гонење на сторителите и одговорност за институционалните пропусти. Тие, исто така, побараа национална стратегија против насилството врз жените и одржливо финансирање за организациите кои им помагаат на жртвите.
Акциите во Загреб, Осиек, Сплит, Риека, Бели Манастир, Пакрац, Вуковар, Вировитица, Беовар, Карловац, Кореница, Копривница, Шибеник, Трогир, Корчула, Задар и Новска беа насочени кон недостатоците во институционалната заштита на жртвите на насилство и случаите на фемицид.
Во Сплит, организацијата „Домине“ ја нагласи потребата системот навреме да го препознае ризикот и да ги заштити жртвите. Според претставничката на „Домине“, Мирјана Кучер од 2016 година, партнери или други мажи во семејството убиле 156 жени.
Додека во Копривница, учесниците пуштија црни балони со пораки во спомен на убиените жени.
Националниот ден за борба против насилството врз жените во Хрватска се одбележува на 22 септември во спомен на судијката Љуљана Хвалец, Гордана Орашкиќ и нејзината адвокатка Хајра Прохиќ, кои беа убиени на овој датум во 1999 година за време на бракоразводна постапка во судот во Загреб, во која беше тешко повреден и еден вработена во судот.
