Синот на поранешниот шах: Европа стои настрана додека Иранците го губат животот

Синот на поранешниот ирански шах ги повика западните земји да се приклучат во војната против Иран и ја критикуваше одлуката на германската влада да не се сретне со него за време на неговата денешна посета на Берлин.

Реза Пахлави, чиј татко беше соборен од власт во револуцијата која го донесе ајатолахот Рухолах Хомеини на власт во 1979 година, ја обвини Европа дека стои настрана и ѝ дозволува на владата во Техеран да ја продолжи крвавата репресија врз протестите во кои кон крајот на минатата година животот го загубија илјадници луѓе.

– Прашањето не е дали ќе дојде до промени. Промената е на пат – рече тој на прес-конференцијата во Берлин. – Вистинското прашање е уште колку Иранци ќе го загубат животот додека заедницата на западните демократии и понатаму само набљудува – додаде тој.

Во центарот на Берлин се одржаа протести на негови приврзаници и противници, при што едно лице беше приведено откако Пахлави беше испрскан со црвена течност, за што беше соопштено дека е доматно пире.

Пахлави, кој поголемиот дел од животот го помина во егзил, се појави како потенцијален опозициски лидер откако минатата година во Техеран и во другите ирански градови избија антивладини протести. Сепак, иранските опозициски движења се длабоко поделени, а многу западни влади се претпазливи во поддршката бидејќи останува нејасно колку широка поддршка ужива тој, речиси половина век по падот на неговиот татко.

Европските земји, вклучувајќи ја и Германија, ја исклучија можноста за приклучување кон Соединетите Американски Држави и Израел, кои на 28 февруари ја почнаа војната со бран воздушни напади во кои беше убиен иранскиот врховен лидер, ајатолахот Али Хамнеи.

Посетата на Пахлави на Германија се реализира во момент кога напорите за завршување на судирот се чини дека се во застој, додека Иран и САД одржуваат блокади на виталната Ормуска Теснина, низ која поминува околу една петтина од светскиот промет со нафта.

Тој изрази жалење што Владата на канцеларот Фридрих Мерц не понудила средба за време на неговата посета на Германија.

– Искористете го своето право. Како демократии, имате право да разговарате со кого сакате – рече тој.