Трагедија кај скопскиот аеродром: Татко и 18-годишен син загинаа во директен судир

Осумнаесетгодишно момче и неговиот татко загинаа во сообраќајна несреќа која се случила околу 2 часот по полноќ на општинскиот пат Илинден -Миладиновци, кај полициската база Брест која се наоѓа во склоп на Меѓународниот аеродром Скопје.

Дежурен јавен обвинител од Основното јавно обвинителство Скопје, вешто лице и увидни екипи на МВР извршија увид на лице место на тешката сообраќајна несреќа, до која дошло кога автомобил Опел корса со кумановски регистарски ознаки, управувано од 19-годишен кумановец се судрил директно со автомобил Хјундаи И30 управуван од 51-годишен жител на Марино.

-Во несреќата на лице место починале возачот на возилото Хјундаи и неговиот 18-годишен син, додека потешко повредена е и 18-годишната ќерка. Со тешки телесни повреди се здобил и возачот на корсата и неговиот сопатник на иста возраст, кои биле пренесени во болница во животозагрозувачка состојба, соопшти денеска Обвинителството.

Јавниот обвинител издаде наредби за обдукција на двете починати лица. Се преземаат дејствија за утврдување на причините за несреќата.

Извор: newz24live.com