Трагедија во Пакистан: Најмалку 15 новороденчиња загинаа во пожар во болница

Најмалку 15 новороденчиња загинаа во пожар во акушерско одделение во главниот град на Пакистан, Исламабад, соопштија локалните спасувачки служби за ДПА.

Пожарот веројатно бил предизвикан од дефект на уред за климатизација во раните утрински часови, соопштија официјални лица.

Само едно од новороденчињата во одделението било спасено, наведуваат тие. Пожарот во меѓувреме е ставен под контрола.

Акушерското одделение е дел од Гинеколошкиот оддел при Пакистанскиот институт за медицински науки, државна болница. Најмалку 16 новороденчиња се наоѓале во одделот за бебиња кога избувнал пожарот.

Телевизиски снимки на „Гео њуз“ (Geo News) прикажуваат густ чад и пожарникари кои интервенираат на местото на настанот. Телевизијата објави дека ќе биде покрената истрага за дополнителните причини за пожарот.

Државните болници во Пакистан не се популарни поради пониските стандарди, па оние кои можат да си дозволат избираат приватни клиники за подобра нега. Лабавите безбедносни стандарди повеќепати доведувале до трагедии во Пакистан