Трамп: Шји Џјинпинг ќе ги посети САД на 24 септември

Американскиот претседател Доналд Трамп денеска изјави дека кинескиот претседател Шји Џјинпинг ќе престојува во официјална посета на САД на 24 септември.

Американскиот претседател рече дека со кинескиот лидер ќе разговара за прашања поврзани со вештачката интелигенција.

Трамп го потврди датумот за посетата за време на настан во Агенцијата за заштита на животната средина, заедно со министерот за енергетика Крис Рајт и други панелисти кои дојдоа таму за да разговараат за напорите на администрацијата да ги одржи трошоците за електрична енергија ниски во услови на превисока побарувачка од центри за податоци за вештачка интелигенција.

Тој го нарече растечкиот сектор на вештачка интелигенција „најголемото нешто што некој некогаш го видел“ и изјави дека САД „ја предводат Кина“ во трката за развој на вештачка генерализирана интелигенција.

– Сакаме да остане така. Претседателот Шји доаѓа на 24 септември и разговаравме за тоа кога бев во Пекинг и ќе разговараме за тоа повторно –  рече Трамп.

Датумот на 24 септември за државната посета првпат беше објавен во мај кога Трамп официјално го покани кинескиот лидер за време на неговата државна посета на Пекинг.