УХМР СО ПРЕДУПРЕДУВАЊЕ: Арктички бран на Балканот -Снег до среда, потоа минус 15 степени и голомразица

Македонија ќе биде под влијание на снежни врнежи до среда. Најсилни ќе бидат во западните и југозападните делови во вторник, а во среда снег ќе има на повеќе места во државата. После тоа, облачноста ќе се намалува, но студот ќе остане интензивен, носејќи арктички услови низ цела Македонија, информираат од УХРМ.

Минималните температури ќе се движат околу -10 степени во утринските часови, а на некои места и до -15. Дневните температури ќе бидат малку над нулата во централните и југоисточните делови, додека во останатите региони ќе останат под нулата.

Во Скопје, утринските температури ќе бидат до -5 степени, а дневните ќе се движат помеѓу 2 и 4 степени. Снег ќе има до среда, но врнежите ќе бидат послаби.

Овој арктички бран, кој доаѓа од северните поларни предели, ќе продолжи да влијае на Македонија до крајот на работната недела. Голомразицата ќе биде голем предизвик за возачите, особено на планинските превои, каде што ќе биде потребна максимална внимателност, предупредуваат метеоролозите.

Комбинацијата на ниски температури и снег ќе ја зголеми лизгавоста на патиштата, што ќе претставува ризик и за пешаците и за возачите.

Во следните денови, иако облаците ќе се расчистуваат, температурите ќе останат ниски и ќе продолжат да создаваат проблеми. Граѓаните се советуваат да избегнуваат патувања ако не е неопходно, а возачите да бидат подготвени со соодветна зимска опрема и да ги следат условите на патиштата. Пешаците се поттикнуваат да избегнуваат замрзнати површини за да ги спречат падовите и повредите.