ВИДЕО Граѓани чекаат за повлекување пари пред Алта банка во Битола

Граѓани денеска чекаат ред за повлекување пари пред главната експозитура на Алта банка во Битола. Снимките кои утрово ги направи екипата на 4news.mk се гледаат луѓе собрани пред влезот и на скалите на експозитурата, дел од нив со чадори.

Ова се случува откако Народната банка на Србија ѝ ја одзеде дозволата за работа на Алта банка АД Белград поради значително влошување на финансиската состојба и загрозување на интересите на депонентите. Одлуката се однесува на банката во Србија.

Од Алта банка АД Битола, пак, денеска соопштија дека банката е ликвидна и продолжува со стабилно и непречено работење.

Во соопштението банката наведува дека е самостојно правно лице, регистрирано во Северна Македонија, кое работи според домашната регулатива и е под непосредна супервизија на Народната банка. Според банката, експозитурите и банкоматите работат во вообичаениот режим, а клиентите имаат непречен пристап до своите средства.

Засега нема потврдени информации за застој или ограничувања при исплатата во битолската експозитура.